財演目標價建議之愛情篇

 今日諗住做下某隻股既資料搜集，睇下點解佢咁折墮啦，結果比我無意中睇到信報網站一篇講目標價既一段野，我睇完真係唔係好明，決定試下將佢理解成愛情。

「你老公每個月比既家用已由一年高位2萬5蚊跌到6千5蚊，技術上已在8千蚊橫行多時。近期人地老公比既家用已經升到不亦樂乎之際，你老公比既家用仍然原地踏步，短期或仍要整固，但中期走勢值得期待。以1萬7千蚊為中期目標，若嫌目標定得太高，可以1萬2千蚊為目標。

喺目前環境下，只要個男人性格人品唔差，整固一段時間後，家用隨時可大幅抽升。簡單而言，如果家用突破9千或者1萬 ，若果閣下投入感情唔多，建議唔好太早離婚，若配合佢無啦啦受到老闆賞識或者中左六合彩二獎既話， 1萬5至1萬7唔難見到。我對婚姻市場睇法樂觀 ，預計所有老公們總身家暴漲至3千3百4十8億，雖然其中一個係李嘉誠 ，就唔係關你老公事。」

當然財演都只係一份職業啦無謂過分狙擊，但作為愛情投資者既你，睇完上面段野相信都一頭霧水，好難覺得有咩幫助。但都真係會有人因為咁樣走去等到突破阻力位。而事實係，如果個老公已經陷入債務危機，又唔識得好好經營自己既事業，分分鐘cap埋你啲錢都搞唔掂，婚姻市場點樣百花齊放都好，都與你既幸福無關。

你係大戶定散戶？

踏入股票市場之前，首先要識得辨別自己係大戶定係散戶。散戶主要係資金實力較小既投資者，諸如普通上班族。相對而言，大戶就係擁有雄厚資金實力既一群喇，可以將股價舞高弄低。稍為了解賭博既 人應該知道，擁有少量本金進入賭場係好難鬥贏擁有大量賭本既莊家的。莊家可以慢慢輸，你輸下 輸下就無了，剩唔返幾多比你輸。

情場上既大戶都係如此，佢地大多數擁有優質既條件，不乏可以選擇既對象；而你條件唔算好好，選擇本

身就唔多，遇到稍為啱心水既可能就急住想要獲利了結，佢地卻可以慢慢黎。而且佢地同股市大戶既操作

係十分相似，要哄你落搭，一定首先要持續令你覺得有機會先得既。

你一開始抱住嘗試一下既心態，投放少少資金落去準備試水，覺得就算自己投資失利都唔會損失太多。然 後佢地就比一啲甜頭你，當中不乏股價上升既苗頭，例如增加關心你既次數，whatsapp回覆既速度提升。

你見到股價走勢係不斷向上升，心裡覺得既興奮又刺激。「應該會繼續向上升喇掛？」然後繼續投放更

多資金。於是佢地更加積極回應你了，利用佢地手裡面源源不絕既「資金」令到股價節節上升，例如主

動提供約會既機會，你簡直覺得自己正在戀愛了，心裡甜絲絲的。然後繼續無止境地付出愛。

到你終於將所有資金用盡喇，可以被壓榨既空間所剩無幾，佢地都發現你已經失去利用價值喇。呢個時

候，股價就會急速墜落。

「對唔住，其實我只係當你朋友。」

「多謝你一直以來既好意，但我諗你誤會左，我對你無感覺。」

然後佢地就頭都唔回咁走喇，人去樓空。

睇到呢度，你認為自己係情場上既大戶定散戶？